प्राङगारिक उत्पादन बिषयमा कार्यदल गठन

यो समाचार 53 पटक पढिएको

काठमाडौं । कृषि तथा पशुपन्छी विकास मन्त्रालयले प्राङगारिक कृषि उत्पादनका बारेमा अध्ययन गर्न १५ सदस्यीय उच्च स्तरीय कार्यदल गठन गरेको छ ।

कृषि तथा पशुपन्छी विकास मन्त्री चक्रपाणी खनालको अध्यक्षतामा रहेको कार्यदललाई अध्ययनका लागि ४ महिनाको समय निर्धारण गरिएको छ ।

प्राङगारिक कृषि उत्पादन प्रणाालीलाई व्यवस्थित रुपमा प्रवर्दन गर्ने तथा प्राङगारिक उपजहरुको प्रमाणिकरण गरी स्वदेशी तथा विदेशी बजारमा विश्वसनीयता बढाउने र बजार प्रवद्र्धन समेत गर्ने उद्देश्यले कार्यदल गठन गरिएको कार्यदलका सदस्य सचिव एवं मन्त्रालयका वरिष्ठ माटो विज्ञ डा. गंगादत्त आचार्यले जानकारी दिए । संघीय मन्त्रालय अन्तर्गत संस्थागत, नीतिगत र कानुनी ढाँचा निर्माण गर्ने र सोही ढाँचाका आधारमा प्रादेशिक तथा स्थानीय सरकारलाई समेत आवश्यकतानुरुप मार्गनिर्देशन गरी अभियानमा एकरुपता कायम गर्ने अपेक्षा मन्त्रालयले गरेको छ ।

कार्यदलमा कृषि राज्यमन्त्री रामकुमारी चौधरी, कर्णाली प्रदेशका भूमि व्यवस्था, कृषि तथा सहकारी मन्त्री विमला केसी, राष्ट्रिय सभा सदस्य डा. विमला राई मन्त्रालयका सचिव युवकध्यव जिसी, राष्ट्रिय किसान आयोगका सदस्य रविन्द्र केसी र खैरहनी नगरपालिका चितवनका प्रमुख लालमणी चौधरी सदस्य छन् ।

त्यस्तै आलु, तरकारी तथा मसलावादी विकास केन्द्रका प्रमखु डा. हरीबहादुर केसी, नेपाल कृषि अनुसन्धान केन्द्र नार्कबाट डा. टिकाबहादुर कार्की, कृषि विज्ञ डा. कृष्णप्रसाद पौडेल, प्राङगारिक अभियान्ताहरु डा. प्रेम थापा र उद्धव अधिकारी, कृषि व्यवसायी राजेन्द्र देवकोटा छन् । कार्यदलको सदस्य सचिवमा मन्त्रालयका वरिष्ठ माटो विज्ञ गंगादत्त आचार्य रहेका छन् ।

कार्यदलले संघीय मन्त्रालय अन्तर्गत तत्कालै प्राङगारिक कृषि प्रवद्र्धनका लागि कस्तो संस्थागत व्यवस्था र कानुनी ढाँचा निर्माण गर्नु पर्ने हो त्यसको सिफारिस सहितको प्रतिवेदन पेश गर्ने कार्यादेश पनि पाएको छ ।

जापानी राजदुत कृषि मन्त्रीबीच भेटबार्ता
यसैबीच कृषि तथा पशुपन्छी विकास मन्त्री चक्रपाणी खनाल बलदेवसँग नेपालका लागि जापानी राजदुत मासामिचि साइगोले शिष्टाचार भेटवार्ता गरेका छन् । सोमबार मन्त्रालयमा भएको भेटमा नेपाल र जापानबीच कृषि तथा पशुपन्छीका क्षेत्रमा हुने सहयोग आदान प्रदानका विषयमा छलफल भएको छ ।

भेटमा राजदुत मासामिचिले उच्च प्रविधिमा आधारित फलफुल तथा तरकारी खेती र अर्गानिक कृषि प्रवद्र्धनमा प्राविधिक सहायता उपलब्ध गराउन जापान तयार रहेको बताए । जवाफमा मन्त्री खनालले उक्त विषयमा परराष्ट्र मन्त्री प्रदिप ज्ञवालीको जापान भ्रमणका क्रममा पनि छलफल भएको भन्दै थप छलफल गरेर त्यसलाई अघि बढाउन सकिने बताए ।

त्यस्तै मन्त्री खनालले बजार प्रवद्र्धन, ठूलो स्केलको फलफुल परियोजना, दीगो विकासलाई प्रत्यक्ष सहयोग पुग्ने खालका कृषिजन्य उत्पादन र यान्त्रिकरण तथा नेपाली युवा कृषकलाई कृषि तालिममा जापान पठाउने विषयमा सहयोग गर्न राजदुत मासामिचिसँग आग्रह गरेका छन् ।

यसैबीच बैदेशिक कृषि र व्यापार तथा नेपालमा लगानीको वातावरण अध्ययन गर्न जापानका सरकारी अधिकारी तथा विज्ञहरु सहितको १९ सदस्सीय टोली नेपाल आउने भएको छ ।

जापानको कृषि, बन तथा मत्स्य मन्त्रालयका बैदेशिक मामिलाका उपनिर्देशक ताकामी नकादाको नेतृत्वमा टोली नेपाल आउन लागेको हो । माघ ८ गते काठमाडौं आइपुग्ने टोलीले माघ १० गते कृषि तथा पशुपन्छी विकास मन्त्रालय, उर्जा, जलश्रोत तथा सिंचाई मन्त्रालय, नेपाल कृषि अनुसन्धान परिषद्, नार्क लगायतसँग छलफल गर्नेछ ।

रचनात्मक प्रतिक्रिया दिनुहोस् :