शुक्रबारदेखि हिमाली कृषि व्यवसाय प्रवद्र्धन प्रदर्शनी

यो समाचार 436 पटक पढिएको

काठमाडौँ, १० फागुन । उच्च पहाडी क्षेत्रमा उत्पादन भएका कृषिजन्य वस्तुलाई प्रवद्र्धन गर्नका लागि ‘तेस्रो राष्ट्रिय हिमाली कृषि व्यवसाय प्रवद्र्धन प्रदर्शनी’ शुक्रबारबाट शुरु हुने भएको छ ।

उच्च पहाड कृषि व्यवसाय तथा जीविकोपार्जन सुधार (हिमाली) आयोजना र नेपाल उद्योग वाणिज्य महासंघले संयुक्त रुपमा आयोजना गर्ने सो प्रदर्शनीमा ७५ वटा कक्ष रहनेछ ।

हिमाली क्षेत्रमा उत्पादन हुने कृषिजन्य वस्तु राखिने हिमाली आयोजनाका प्रमुख डा. विजयकान्त झाले विहिबार राजधानीमा आयोजित पत्रकार सम्मेलनमा जानकारी गराए । उनले उच्च पहाडी क्षेत्रमा उत्पादन भएका जडीबुटी, कृषिजन्य र पशुजन्यको राष्ट्रिय अन्तर्राष्ट्रिय रुपमा प्रवद्र्धन गर्नका लागि प्रदर्शनी आयोजना गरिएको बताए ।

तीन दिनसम्म चल्ने प्रदर्शनी संखुवासभा, दोलखा, रसुवा, मनाङ, डोल्पा, जुम्ला, मुगु र हुम्लामा उत्पादन हुने याकको चिज, छुर्पी, राडीपाखी, तरकारीको बीउ, तोरा जुस, रसुवाको कालो मसुरो, जुम्ली मार्सी चामल, हिमाली हर्बल चिया, सिलाजित, कर्णालीको सिमी, स्याउको चाना, ओखर, चिराइतोलगायत राखिने छ ।

प्रदर्शनीको शुक्रबार काठमाडौँको प्रदर्शनीमार्गस्थित भृकुटीमण्डपमा उपराष्ट्रपति नन्दबहादुर पुनले उद्घाटन गर्नेछन् । करिब रु एक करोडको कारोबार हुने अपेक्षा गरिएको उक्त प्रदर्शनीमा निःशुल्क प्रवेशको व्यवस्था मिलाइएको छ ।

रचनात्मक प्रतिक्रिया दिनुहोस् :