दैलेखमा उत्पादन भयो, १७ करोडको सुन्तला

यो समाचार 766 पटक पढिएको

दैलेख । दैलेखमा यो वर्ष करिव १७ करोड रुपैयाँबराबरको सुन्तला उत्पादन भएको छ । जिल्ला कृषि विकास कार्यालयका अनुसार गत वर्ष १० करोड रुपैयाँबराबरको सुन्तला उत्पादन भएकोमा यस वर्ष करिब १७ करोडको उत्पादन भएको हो ।

गत वर्ष जिल्लामा १ हजार ५ सय ७६ हेक्टरमा सुन्तला खेती गरिएको भए पनि ५ सय ८२ हेक्टरबाट ५ हजार ८ सय ६४ टन सुन्तला उत्पादन भएको जिल्ला कृषि विकास कार्यालयको तथ्यांकमा उल्लेख छ । गत वर्षको तुलनामा जिल्लामा यस वर्ष ०.५ प्रतिशतले मात्र सुन्तला उत्पादनमा वृद्धि भएको जिल्ला कृषि विकास कार्यालय दैलेखका योजना अधिकृत राजु भुजले बताए ।

उनका अनुसार यस वर्ष ५ सय ८५ हेक्टरमा फलेको सुन्तलाबाट ५ हजार ८ सय ८६ टन उत्पादन भएको हो । विगतका वर्षमा भन्दा तुलनात्मक रुपमा गत वर्ष दैलेखमा सुन्ला उत्पादनमा वृद्धि भए पनि यो वर्ष सुन्तलामा फैलिएको रोग किराले ०.५ प्रतिशतले मात्र वृद्धि भएको अधिकृत भुजले बताए ।

जिल्लामा १७ करोड रुपैयाँबराबरको सुन्तला उत्पादन भए पनि यस वर्ष करिब १२ करोडको निर्यात हुने अनुमान गरिएको जिल्ला कृषि विकास कार्यालय दैलेखले जनाएको छ । सो कार्यालयका अनुसार उत्पादनको ६० प्रतिशत सुन्तला निर्यात र करिव ४० प्रतिशत जिल्लामै खपत हुने गरेको छ ।

दैलेखको दुल्लु, छिउँडी, गमौडी र सेर्माकोट क्षेत्रमा सुन्तला बढी उत्पादन हुने गरेको छ । त्यस्तै जम्भुकाँध, चामुण्डा र विशालालगायतका क्षेत्रका किसान पनि सुन्तला खेतीप्रति आकर्षित हुँदै गएका छन् ।

सुन्तला उत्पादन बढाउन जिल्ला कृषि विकास कार्यालयले यस वर्षदेखि १ सय ६० हेक्टरका लागि ५० प्रतिशत अनुदानमा कृषकलाई ४८ हजार सुन्तलाको बेर्ना उपलव्ध गराउने तयारी गरेको छ । सुन्तला उत्पादनमा वृद्धि ल्याउन यस वर्षदेखि विभिन्न योजना अगाडि बढाइने योजना अधिकृत भुजले बताए ।

“सुन्तलाका लागि राम्रो हावापानी भए पनि पुराना बगैंचाको व्यवस्थापन गर्न नसक्दा उत्पादन कम हुने गरेको हो,” अधिकृत भुजले भने, “उत्पादन वृद्धि गर्न बाली उपचार शिविर, समस्या निदान अभियान र काँटछाँटको अभियान सञ्चालन गर्ने तयारी गरेका छौं ।”

सुन्तला वालीमा क्षेत्र विस्तार तथा वजारीकरण गर्न दैलेखमा प्रधानमन्त्री कृषि आधुनिकीकरण परियोजना सञ्चालनको तयारी भएको पनि अधिकृत भुजले बताए । दैलेखमा उत्पादित सुन्तला स्थानीय बजारका साथै सुर्खेत, नेपालगन्ज, बुटवल, काठमाडौंलगायतका शहरमा निर्यात हुने गरेको छ ।