पहिले कानून व्यवसायी, अहिले कुराउनी व्यवसायी

यो समाचार 301 पटक पढिएको

बागलुङ ,   १३ फागुन /कानूनमा बि.एल.सम्मको अध्ययन गरेका त्रिलोचन कँडेलले कुराउनी बेच्न थालेको वर्षौं भइसकेको छ । बागलुङमा जन्मेका ४७ वर्षीय कँडेलले १५ वर्ष अघि कानूनी सेवा केन्द्र बन्द गरेर कृषि पेशामा प्रवेश गरेका थिए । २०५२ मा बागलुङ बजारमा कानूनी सेवा केन्द्र खोलेर कानुन व्यवसायीका रूपमा परिचय बनाइसके पनि एकाएक पेशा परिवर्तन गरेका उनले अहिले आफ्नो बेग्लै व्यवसायिक परिचय बनाइसकेका छन् ।kurilonewsagrocom‘कानुनी पेशामा अर्कालाई नढाँटेसम्म पैसा नकमाइने देखेँ, मलाई किन किन त्यो पेसामा रुचि बस्दै बसेन, अनि मैले खेती किसानी नै रोजेँ’ कँडेलले भने । घरमा बस्तुभाउ पाल्ने र खेती किसानी गर्ने काममा तल्लिन कँडेलले मुख्य गरी दूधबाट बन्ने कुराउनीलाई व्यापारको मुख्य वस्तु बनाएका छन् । त्यसबाहेक दूध र अन्य दुधजन्य पदार्थ पनि बेच्ने गरेको कँडेलले बताए ।

 

 

उनका अनुसार घरमा अहिले तीन वटा दुहुना भैँसी छन् । उनले दूधका लागि पाँच वटासम्म भैँसी पाल्ने गरेको कँडेल अनुभव सुनाए । यामअनुसार दूधजन्य पदार्थको उत्पादनको परिमाण धेरथोर हुने भए पनि मुख्य याममा भने एकै महीनामा रु. ५० देखि ७० हजारसम्म कमाइ हुने गरेको कँडेलको भनाइ छ । कुराउनीकै आम्दानीले गाउँमै २० लाखको लागतमा एउटा घर र तीन वटा गोठ निर्माण गरिसकेका कँडेलले दुई छोरा, दुई छोरी र श्रीमतीको दैनिक खर्चका साथै घरको सम्पूर्ण घरव्यवहार आफ्नै कमाइबाट चलाएको बताए । यसबाहेक उनले बार्षिक रुपमा केही लाख रुपैयाँ पनि बचत गर्न सकेको बताएका छन् ।

 

‘सबैभन्दा बढी कुराउनीको माग दसैँ तिहारका बेला हुन्छ, त्यो याममा मागअनुसार कुराउनी पुर्‍याउन पनि धौधौ हुन्छ’ कँडेलले भने ।‘ एकदिन १० देखि १२ किलोसम्म कुराउनी लिएर म बजार पुग्ने गर्छु ।’ घरमै उत्पादन गरेको कुराउनी पोखरा, पर्वतको कुस्मा र म्याग्दीको बेनी बजारमा लगेर बेच्ने गरेको बताउँदै उनले बागलुङ बजारमा आफू दैनिक कुराउनी लिएर आउने बताए । ‘शुद्ध दूधको कुराउनी बनाउने गरेको छु, त्यसैले पनि माग आइरहन्छ, मैले बजार–बजार घुमेर पनि बिक्री गर्ने गरेको छु ,’ उनले भने ।

 

 

कुराउनी बाहेक कँडेलले कहिलेकाहीँ दूध, दही र घ्यूसमेत बेच्ने गरेका छन् । उनले कुराउनीको प्रतिकेजी रु. एक हजार २ सयमा बेच्ने गरेका छन् । त्यस्तै दूधको रु. ५०, दही ५० र घ्यू प्रतिमाना ५ सयमा बेच्ने गरेको बताए ।

रचनात्मक प्रतिक्रिया दिनुहोस् :